唐英年私生子【圖】

疑似特首候選人唐英年同梁振英，為咗特首選舉不時隔空出招。政圈盛傳原定今辭政務司司長職務嘅唐唐，因技術問題或順延一至兩日至辭職，期間更突然爆出唐唐或有「私生子」嘅爆炸性新聞。唐唐多名老友聞言矢口否認，不過唐唐一日唔親口否認，呢啲咁嘅傳聞仲會繼續喺政圈傳落去。

傳今日請辭或變卦

唐唐辭職備選喺政圈流傳已久，最快會喺今日正式遞信，但有傳唐唐辭職時間表或有變卦，政界主要有兩個講法︰第一，唐唐唔希望畀唐營中人事前孔明講中辭職日期；第二，唐唐有很多技術問題需要處理，所以或會順延一至兩日才辭職。

講開唐唐要處理嘅技術問題，其實真係多不勝數，競選政綱、競選口號等當然係重中之重，政商界尋晚仲失驚無神瘋傳，唐唐除咗之前「過去式」緋聞外，或者仲有 「私生子」，件事係喺唐唐入政壇前發生，唐唐一九九一年入政壇，即係如果有私生子，都已經有二十歲喇。唐唐多名老友被問及此事都矢口否認，有唐唐老友主動 四出求證後斷然否認，急忙為唐唐撲火，唐唐嘅新聞秘書亦對傳聞不作回應。

正所謂「紙包唔住火」，如果一切只係誤傳就最好，唐唐自然飲得杯落；如果不幸傳聞真的被炒熱，唐營中人就準備要捋好衫袖，準備好做政治消毒工作喇！

話時話，有人話唐英年擁有公共行政經驗，因此得到公務員支持，呢個係佢其中一項優勢。

不過擁有六萬會員嘅公務員團體華員會會長黃河同前天文台台長林超英都唔 同意呢個講法。黃河尋日喺記者會話，下屆特首如果有公務員經驗，並唔係絕對嘅條件，因為依家講緊嘅係選特首而唔係公務員之首。林超英日前喺網誌上亦不約而 同咁講出類似論點，佢話作為資深公務員，必須畀人睇到你有誠信、有理念、有方向、有抱負、有熱誠、有智慧、有能量等等。佢質疑，到底呢位被支持者吹捧得到 公務員支持嘅人，有冇上述特質。

教育評議會最近訪問七十間中 小學共二百八十名校長、副校長同教師，就各疑似特首候選人嘅支持度評分，以十分為滿分，最高分係自言係唐唐支持者嘅全國人大常委范徐麗泰，有五點六六分， 梁振英排名第二，有五點零二分，其他人都低過合格嘅五分，唐唐只有四點四四分，喺八人中只排第五名。

reference:
http://the-sun.on.cc/cnt/news/20110919/00408_001.html